Forsíða :: Þjónusta :: Grundasel - skóladagvist

Grundasel - Skóladagvist Grundaskóla

Samvinna – Traust - Virðing

Skóladagvist er í boði fyrir nemendur í 1.-4. bekk. Foreldrum gefst því kostur á að lengja viðveru barna sinna í skólanum eftir þörfum hvers og eins en í samræmi við gildandi reglur fyrir skóladagvist á Akranesi.

Síminn hjá okkur er 433 1425/433 1423 og gsm 863 1425 einnig er hægt að senda töluvpóst til okkar á netfangið asa.lindal.hinriksdottir@akranes.is

Það er leikur að læra

Markmið okkar er að hver einstaklingur fái að njóta sín og þroskast í umhverfi sem einkennist af hlýju, öryggi og virðingu. Lögð er áhersla á að þroska félagslega færni í samskiptum í gegnum leik og starf sem og virðingu fyrir sjálfum sér, öðrum og umhverfi sínu. Einnig er haft að leiðarljósi

að virða og virkja sjálfsprottinn leik barnanna
barnalýðræði, efla hæfni barna til sjálfstæðra skoðana og til að hafa áhrif á umhverfi sitt og aðstæður
að hvetja börnin til góðrar umgengni
að hjálpa börnunum til að öðlast skilning á þörfum og tilfinningum
leggjum áherslu á góða samvinnu milli starfsfólks skóladagvistarinnar og foreldra

Daglegt starf

Þegar krakkarnir koma inn í skóladagvist byrja þau á klemmuvali þar sem í boði eru ýmsir leikir svo sem bílar, dúkkur, playmó, perla, föndra, hlutverkaleiki, leira, tölvur, video og útileikir. Einu sinni í viku fara krakkarnir í klúbbastarf, þar er boðið upp á smíðaklúbb, listaklúbb og saumaklúbb. Einnig fara krakkarnir úr 2.-4. bekk tvisvar í viku í leshóp sem er í umsjón kennara.

Hressing

Boðið er upp á hressingu klukkan 15:00 niðri í borðsal. Þar er börnunum boðið upp á mjólk, vatn, brauð, hrökkbrauð, álegg, grænmeti, ávexti og einu sinni í viku fá þau kex.

Opnunartími

Skóladagvist er opin alla daga sem skólinn starfar, einnig á skipulagsdögum kennara. Lokað er í vetrarfríum og lögbundnum skólafríum (t.d. öskudag). Opið er frá mánudegi til föstudags frá klukkan 13:00-16:30. Ef fimm eða fleiri foreldrar óska eftir lengri opnunartíma þá getur hann lengst verið til klukkan 17:00.

Á haustin byrjar skóladagvistin sama dag og skólinn hefst og lokar á vorin á síðasta skóladegi fyrir sumarfrí.

Greiðslufyrirkomulag

Lágmarks tímafjöldi sem þarf að greiða fyrir er 28 klst. á mánuði. Vegna jóla- og páskafría er lágmark tímafjöldi í þeim mánuðum ca 24 tímar. Gjöldin eru greidd eftirá með gíróseðli. Eindagi er 25. dag næsta mánaðar eða næsta virkan dag ef 25. Er á helgi.

Hér má sjá gjaldskrá fyrir skólaárið 2011 - 2012.

Ef um 3ja mánaða skuld eða eldri vegna vistunargjalda er að ræða skoðast það sem uppsögn á vistun.