Landsmót barnakóra - Hvolsvelli September 2024

Skólakór Grundaskóla var þátttakandi á Landsmóti barnakóra í ár.
Ólíkt öðrum mótum er ekki keppt í kórsöng heldur snýst mótið um samveru og samkennd. 11 kórar tóku þátt í ár og þar af voru 200 börn.
Fyrsta slíka kóramótið var haldið árið 1977 í Reykjavík í Háskólabíó. Markmið þeirra er að efla tónmennt og þá sérstaklega kórsöng í skólum landsins.

Kórarnir æfa saman lög og halda svo tónleika á lokadeginum þar sem foreldrum og aðstandendum er boðið að koma og hlusta á afrakstur mótsins.
Þemað í ár var íslensk dægurlög og mátti heyra dægurlagaperlur, nýlegar og gamlar, óma um gangana í Hvolsskóla á Hvolsvelli en síðar voru tónleikarnir haldnir í Hvoli sem er félagsheimili bæjarins.
Einnig var kvöldvaka þar sem kórar komu með skemmtiatriði sem vakti mikla lukku en kórstjórar brugðu einnig á leik við mikinn fögnuð kórfélaga.

Meðfylgjandi eru myndir úr ferðinni. Kórstjóri er Lilja Margrét Riedel.