Umhverfisstofnun lagði Grundaskóla

Nú liggja fyrir úrslit í keppni vinnustaða á Íslandi, Hjólað í vinnuna árið 2022. Starfsfólk Grundaskóla lenti í öðru sæti á eftir Umhverfisstofnun í keppni fyrirtækja með 70-129 starfsmenn en í fyrra var röðin öfug. Glæsilegur árangur þó að sjálfsögðu hefðum við viljað vera sæti ofar.

Íþrótta- og Ólympíusamband Íslands stóð í tuttugasta sinn fyrir verkefninu Hjólað í vinnuna, heilbrigðri vinnustaðakeppni um allt land, dagana 4.-24. maí. Fyrir mörgum er verkefnið vorboðinn ljúfi og er verkefnið orðið stór þáttur í fyrirtækjamenningunni á mörgum stöðum. Landsmenn hafa tekið verkefninu mjög vel og hefur hjólaumferð aukist verulega síðan verkefnið fór fyrst af stað.

Aðstæður á Akranesi eru einstakar hvað varðar möguleika hvað varðar umhverfisvænan og hagkvæman ferðamáta. Við hvetjum allt skólasamfélagið til að ganga eða hjóla á milli heimilis og vinnustaðar.

Grundaskóli er heilsueflandi grunnskóli.